Positiivvalaš sierrameannudeapmi
Positiivvalaš sierrameannudeapmi mearkkaša dárbbašlaš sierradoaibmabijuid, mat dahkkojuvvojit dorvvastan dihte duođalaš ovttaveardásašvuođa. Sierradoaibmabijuiguin buoridit dihto jovkui gullevaš olbmuid sajádaga ja dili. Positiivvalaš sierrameannudeamis ásahuvvo ovttaveardásašvuođalágas.
Buot olbmuid seammalágan meannudemiin ii álot juksojuvvo duođalaš ovttaveardásašvuohta. Duođalaš ovttaveardásašvuođa ollašuvvan sáhttá eaktudit, ahte vuhtiiváldojuvvojit dan joavkku sierradárbbut, mii lea earenoamáš suojehis vealaheapmái. Dalle sáhttá vihkkedallat positiivvalaš sierrameannudeami.
Nappo ovttaveardásašvuođalága mielde dakkár rievtteslágan earálágan meannudeapmi, mii viggá ovddidit duođalaš ovttaveardásašvuođa, dahje eastadit ja váldit eret vealaheami dagahan hehttehusaid, ii leat vealaheapmi.
Positiivvalaš sierrameannudeapmi lea lobálaš maiddái diliin, main ii aitosaččat leat sáhka vealaheami dagahan hehttehusaid eastadeamis dahje geahpedeamis. Sáhttá leat dárbbašlaš doarjut sin, geat leat servodagas geahnohut sajádagas, vaikko geahnoheappo sajádaga eai sáhte duođaštit leat čuovvumuš vealaheamis. Ovdamearkka dihte lámisolbmuid ovttaveardásaš sajádaga sáhttet viggat buoridit positiivvalaš sierrameannudemiin.
Positiivvalaš sierrameannudeamis gullá muhtumin geavahuvvome čádjidahtti doahpaga positiivvalaš vealaheapmi. Positiivvalaš sierrameannudeamis ja dan kritearain ásahuvvo lágain, ja das galggašiige geavahit álot doahpaga positiivvalaš sierrameannudeapmi, ii doahpaga positiivvalaš vealaheapmi.
Positiivvalaš sierrameannudeapmi galgá leat plánalaš
Positiivvalaš sierrameannudeapmi lea eará ášši go oidin, mas lea sáhka ovdavuoigatvuođaid addimis vugiin, mii vealaha earáid. Positiivvalaš sierrameannudeapmi galgá leat mihttomearis ektui rievttes dásis. Doaibmabijuid rievttes dássi árvvoštallojuvvo álo dáhpáhusa ja dili mielde.
Positiivvalaš sierradoaibmabijut galget leat gaskaboddosaččat, ja positiivvalaš sierrameannudeami bistima ja viidodaga galgá meroštallat dárkilit. Dát mearkkaša dan, ahte sierrameannudeamis galgá luohpat, go dilli lea divvašuvvan.
Positiivvalaš sierrameannudeapmi galgá leat maiddái plánalaš. Earenoamážit bálkáheamis galgá positiivvalaš sierrameannudeamis vuhtii váldit earret eará čuovvovaš áššiid:
- Positiivvalaš sierrameannudeamis galggašii bálkáheami olis mearridit ovddalgihtii, ja dan lea buorre ovdanbuktit juo bargobáikealmmuhusas. Juos positiivvalaš sierrameannudeamis mearriduvvo easka válljedettiin bargi, sáhttet atnit meannudeami álkit mielaevttolažžan.
- Positiivvalaš sierrameannudeami doaibmabiju sáhttá čujuhit olbmuide, geat gullet olmmošjovkui, mii lea eahpegovttolaš dahje geahnohut sajádagas earáid ektui.
- Positiivvalaš sierrameannudeapmi ii sáhte mearkkašit, ahte automáhtalaččat ja eavttuheamet addojuvvo ovdasadji olbmui, guhte gullá ilá unnán ovddastuvvon jovkui, muhto baicca ohcciid galgá veardádallat bealeheamet. Dát mearkkaša dan, ahte muhtin ilá unnán ovddastuvvon jovkui gullevaš olbmo sáhttet válljet sullii seamma gelbbolaš ohcciid joavkkus.
Positiivvalaš sierrameannudeapmi ovddida ovttaveardásašvuođa
Buohkaid seammalágan meannudeapmi ii praktihkas reahkká dorvvastit dan, ahte servodagas geahnohut sajádaga olmmošjoavkkuin livčče ovttaveardásaš vejolašvuođat ovdamearkka dihte skuvlet iežaset dahje oažžut barggu. Duohtaáššis olbmot gártet eahpeovddolaš sajádahkii dávjá aiddo muhtin gildojuvvon vealahanákka, degomat seksuála orientašuvnna, riegádanduogáža dahje váttu dihte. Dát lea čuovvumuš dávjá vealaheamis ja ovdagáttuin, mat leat servodaga ráhkadusain.
Duođalaš ovttaveardásašvuođa ollašuvvan sáhttáge eaktudit, ahte daid joavkkuid, mat leat earenoamáš suojeheamet vealaheapmái, dárbbut váldojuvvojit vuhtii. Positiivvalaš sierrameannudeapmi lea okta vuohki ovddidit duođalaš ovttaveardásašvuođa ollašuvvama, ja geahpedit ja eastadit hehttehusaid, mat šaddet vealaheamis, mii lea ráhkadusain. Positiivvalaš sierrameannudeami ulbmil nappo lea, ahte buohkain livččii maiddái praktihkas vejolašvuohta ovttaveardásaš vuoigatvuođaide.
Ovdamearkkat positiivvalaš sierrameannudeamis:
- Sisafárrejeddjiide lágiduvvo giella- dahje eará skuvlejupmi álkidan dihte ruovttuiduhttima suopmelaš servodahkii
- Dihtomearit oahppolágádusaide unnitlohkui gullevaš joavkkuide dahje joavkkuide, mat leat vealahanvára vuolde dahje servodagas geahnohut sajádagas
- Studeanttaid válljendilis guovtti sullii seamma gelbbolaš ohcci buohta addojuvvo ovdasadji ovdamearkka dihte ohccái, geas lea románaduogáš dahje guhte ovddasta eará etnalaš joavkku, dalle go namuhuvvon suorggis lea vátni bargiin, geat ovddastit unnitlogujoavkkuid
- Čuozihuvvon hárjeheapmi válljeniskosa várás dihto jovkui, mas leat ilá unnán ovddasteaddjit oahppolágádusas.