Vealaheapmái darváneapmi ja ovttaveardásašvuođa ovddideapmi

Ovttaveardásašvuođaáittardeaddji deháleamos bargu lea ovddidit ovttaveardásašvuođa,  eastadit vealaheami ja darvánit dasa. Ovttaveardásašvuođaáittardeaddji bargu lea árvvoštallat ja sihkkarastit, ahte olbmuid vuoigatvuođat ja indiviidda vuoigatvuođadorvu ollašuvvet ovttaveardásaččamus lági mielde. Áittardeaddji barggut ja doaibmaváldi leat girjejuvvon ovttaveardásašvuođaláhkii ja láhkii ovttaveardásašvuođaáittardeaddjis.

Ovttaveardásašvuođaláhka dahká vejolažžan máŋga iešguđet vuogi, maiguin áittardeaddji sáhttá darvánit vealaheapmái ja ovddidit ovttaveardásašvuođa. Praktihkas ovttaveardásašvuođaáittardeaddji bargu lea ovdamearkka dihte rávvet, čielggadit ovttaskas dáhpáhusaid, ovddidit soabadeami oassebeliid gaskkas, skuvlet, čohkket dieđu ja váikkuhit láhkaásaheapmái ja eiseválddiid geavadagaide. Áittardeaddji sáhttá maiddái doalvut vealaheapmái guoski ovttaskas ášši ovttaveardásaš- ja dásseárvolávdegoddái dahje duopmostullui čovdojuvvot. Áittardeaddji dahká olu čanusjoavkoovttasbarggu ja váikkuhanbarggu ovttaveardásašvuođa ovddideami ovdii ja eastadan dihte vealaheami ja darvánan dihte dasa.

Ovttaveardásašvuođaáittardeaddjái sáhttá doarjalit, juos lea vásihan dahje áican vealaheami agi, riegádanduogáža, riikkavulošvuođa, giela, oskku, nana jáhku, oaivila, politihkalaš doaimma, ámmátsearvedoaimma, bearašgaskavuođaid, dearvvašvuođadili, lámisvuođa, seksuála orientašuvnna dahje olbmui laktáseaddji eará siva vuođul.