Oovtviärdásâšvuotâváldálâš Kristina Stenman uásálist onne sämmilij parlament 50 ive juuhlán. 

Tiervâttâs Sämitiigán sämmilij parlament 50 ive juhleest
Oovtviärdásâšvuotâváldálâš Kristina Stenman
Aanaar 28.11.2023

Kijttoseh, ete mij uážžup leđe tääbbin áávvudmin sämmilij parlament 50 ive juhle! 
Majemui vittlov ive ääigi sehe algâaalmug sämmilij jiešmeridemvuoigâdvuotâ já sämikielâ já -kulttuur sajattâh Suomâst láá ovdánâm merhâšitteht. Sämmilijn lii Sämitige peht jieijâs jienâ syemmilii ohtsâškoddeest. Jieijâs kielâ kevttimkiäldui saajeest sämmilijn lii vuoigâdvuotâ oppâđ jieijâs kielâ já päikkikuávlust meid finniđ škovlim jieijâs kielân. 

Historjá já onnáá peeivi-uv uásild lii tehálâš, ete mij pyehtip kieđâvuššâđ meid vaigâdis aašijd. Lii velttidmettum, ete kolonialism historjást já ton tááláá ääigi vaikuttâsâin savâstâlloo vijđásubbooht Suomâst. Sämmiláid čuáccám kolonialism lii uási taan mii historjá sevŋâdub puudâst. Tuotâvuotâ- já sovâdâttâmproosees tárguttâssân lii kieđâvuššâđ historjálii já tááláá olgoštem já lääččiđ vuáđu sämmilij vuoigâdvuođâi pyereeb olášumán. 

Algâaalmug sämmilij vuoigâdvuođâi olášumán lii eromâš tehálâš, ete sämitiggelaahâ uđâsmittoo. Uđâsmitmist lii Sämitige ovdâsteijei noonâ eenâblovo kyedittem. Syemmilâš ohtsâškodde ij pyevti paijeentoollâđ väivideijee savâstâllâm sämmilâšvuođâst ääjitmáin laavâ uđâsmittem agâittáá. Mij kolgâp lyettiđ toos, ete haldâttâs iävtuttâs adeluvvoo vala taan ive ääigi. Tot ličij hiäivulâš vyehi meid ávudiđ Säämi parlament já Sämitige ohtsii vittlov ive historjá.

Mun tuáivuttâm Sämitiigán miänástus puáttee iheluvvijd, já taan mield nanosub vuoigâdvuođâid sämmiláid já sämikielân já sämikulttuurân.